Hvernig þú velur réttu aukahlutina á baðherbergið

Baðherbergi er ekki fullbúið án aukahluta. Að eldhúsinu undanskildu þá er baðherbergið eitt af mikilvægustu herbergjunum á heimilinu. Þar geturðu baðað og sturtað þig, rakað þig, málað þig, slakað á eða létt af þér. Þú getur einnig sett þinn persónulega stíl á baðherbergið. Vel heppnuð baðherbergishönnun blandar saman hagkvæmni og stíl og hún ætti jafnframt að auðvelda þér lífið og ýta undir heildarútlit rýmisins á fallegan hátt.

Þegar þú hannar baðherbergið þá áttu án efa eftir að velta fyrir þér hvaða aukahlutir séu viðeigandi. Úrvalið af aukahlutum er afar mikið og því getur reynst flókið að velja réttu hlutina. En þú þarft ekki að hafa neinar áhyggjur. Þessar leiðbeiningar ættu að hjálpa þér að velja réttu aukahlutina á baðherbergið.

Hvaða gerðir af aukahlutum fyrir baðherbergið eru til?

Nokkrar mismunandi gerðir eru af baðherbergishlutum sem flestir ættu að þekkja. Leitin að réttu aukahlutunum fyrir baðherbergið verður auðveldari þegar þú áttar þig á því hvaða valkostir eru í boði. Hér að neðan skoðum við helstu gerðir aukahluta fyrir baðherbergið.

Tannburstaglös og sápudiskar

Tannburstaglös og sápudiskar eru hagnýtir og þægilegir aukahlutir fyrir baðherbergið og þeir hjálpa til við að halda baðherberginu hreinu og snyrtilegu. Þeir eru bæði ódýrir og auðveldir í uppsetningu. Þeir eru einnig fáanlegir með allskyns áferðum og í allskyns hönnunum og þú finnur því án efa vöru sem hentar baðherbergisinnréttingunni þinni.

Aukahlutir fyrir sturtuna

Þörfin til að aðskilja sturturýmið frá restinni af baðherberginu hefur aukist og því er hægt að velja úr miklu úrvali fylgihluta fyrir sturtuna. Hillur og sturtukörfur spara pláss og halda sturtuvörunum þínum skipulögðum. Sniðugt er að velja fastar einingar frekar en einingar með sogskálum þar sem sogskálar eiga það til að losna á baðherberginu. Til að koma í veg fyrir að vatn skvettist á baðherbergisgólfið og til að auka næðið í sturtunni þá er sniðugt að setja sturtuhengi á innkaupalistann. Þú getur valið gardínur með hringjum eða krókum, allt eftir því hvað þú kýst. Að lokum er gott að gleyma ekki baðmottu. Hún dregur ekki bara í sig vatn sem skvettist heldur er hún líka afar handhæg þegar þú stígur úr sturtunni og vilt forðast að renna.

Aukahlutir fyrir klósettið

Klósettaukahlutir geta verið annað hvort frístandandi eða fastir. Flestir klósettrúlluhaldarar eru veggfestir en þó er einnig mögulegt að finna frístandandi haldara. Þeir gætu einnig verið með loki, sem kemur sér sérstaklega vel ef klósettið er nálægt sturtunni. Klósettrúlluhaldarar fást í mismunandi efnum en algengustu efnin eru viður, ryðfrítt stál og ál. Klósettburstahaldari og bursti eru einnig nauðsynlegir á baðherbergið. Þeir fást bæði fastir og frístandandi en fastir eru oft þægilegri og endingarbetri.

Aukahlutir fyrir baðkarið

Ef þú ert með baðkar þá hefurðu úr allskyns aukahlutum að velja. Til að hafa baðvörurnar handhægar þá er sniðugt að vera með baðbakka. Þessi tegund fylgihluta veitir nægilegt geymslupláss fyrir nauðsynjamuni á baðherberginu. Þú getur einnig notað bakkann til að geyma bækur, glös og kerti. Sumir henta meira að segja til að geyma handklæði þegar þú ert ekki að nota baðkarið. Baðmottur henta einnig afar vel við baðkarið. Þær koma í veg fyrir að þú rennir til og þær gefa rýminu auk þess íburðarmikið yfirbragð. Baðmottur fást í mismunandi litum og stærðum sem henta þörfum hvers og eins. Þú getur motturnar fyrir framan baðkarið eða sturtuna.

Baðherbergisspegill

Baðherbergisspegill er einn mikilvægasti fylgihlutur baðherbergisins. Við notum hann til að raka okkur, farða okkur og skoða hvernig við lítum út. Speglar eru hagkvæmir og hægt er að nota þá sem áberandi skrautmun á baðherberginu. Þeir auka einnig birtu í rýminu sem fær herbergið til að virka stærra en það er. Baðherbergisspeglar fást í mismunandi gerðum, stærðum, stílum og hönnunum. Þeir geta verið rétthyrndir, ferhyrndir, kringlóttir eða sporöskjulaga. Þeir fást þar að auki bæði rammalausir og með ramma.

Hvað er besta efnið fyrir aukahluti á baðherbergið?

Aukahlutir fyrir baðherbergið fást í allskyns mismunandi efnum sem henta þörfum hvers og eins. Hvert efni hefur sína kosti og ókosti. Best er að velja efni sem er hagnýtt, endingargott og auðvelt í viðhaldi. Hér að neðan skoðum við nánar þau efni sem eru í boði fyrir aukahluti á baðherbergið.

Ryðfrítt stál

Óþarfi er að kynna ryðfrítt stál þar sem flestir þekkja efnið nokkuð vel. Vinsældir efnisins stafa af ryðþolinu, en efnið ryðgar afar sjaldan. Þessi eiginleiki þýðir einnig að efnið er tilvalið fyrir aukahluti á baðherbergið. Hægt er að setja ryðfrítt stál saman við önnur efni og áferðir til að búa til útlit sem hentar flestum baðherbergjum. Efnið er einnig auðvelt í þrifum og fæst í allskyns hönnunum.

Látún

Látún er sennilega vinsælasta efnið fyrir baðherbergishluti þar sem það er fjölhæft, sterkt og endingargott - jafnvel þegar það er mikið notað. Efnið hefur góðan líftíma og þolir mikið slit. Það er auk þess ónæmt fyrir ryði þar sem það inniheldur örlítið magn af járni. Þetta gerir efnið að frábærum valkosti fyrir aukahluti á baðherbergið þar sem þeir komast daglega í snertingu við vatn.

Ál

Líkt og með ryðfrítt stál þá er ál ryðþolið og það er því frábær valkostur við stál. Baðherbergishlutir úr áli eru góður kostur fyrir fólk sem býr á svæðum þar sem mikið salt er í loftinu, eins og á strandsvæðum. Ál er léttur efniviður og það er því aðallega notað fyrir hillur, handklæðarekka, krana og bakka. Eitt sem þarf að hafa í huga varðandi ál er að þó að það ryðgi ekki þá er það engu að síður gjarnt á að tærast með tímanum. Hins vegar geturðu komið í veg fyrir tæringu með því að viðhalda efninu vel.

Plast

Plast er ódýrasti efniviðurinn fyrir aukahluti á baðherbergið. Efnið fæst í ýmsum gerðum og hönnunum. Þó að mörgum finnist plast líta billega út og hafa neikvæð áhrif á heildarútlit rýmisins þá er það engu að síður frábært efni ef ráðstöfunarfé er af skornum skammti. Plast er einnig tilvalinn efniviður fyrir eigendur sem langar til að leigja húsnæðið út. Þar að auki hentar það frábærlega í barnaherbergi þar sem auðvelt er að skipta því út.

Króm

Króm er vinsæl málmáferð fyrir aukahluti á baðherbergið. Krómáferð er algeng á allskyns hlutum (allt frá sturtuhausum til tannburstahaldara) og hún sést á baðherbergjum um gjörvallan heim. Aukahlutir með krómáferð gefa baðherberginu frískandi útlit þar sem glansandi og endurspeglandi yfirborðið lýsir upp rýmið. Krómáferð er einnig auðveld í viðhaldi – það eina sem þarf er rakur klútur til að þurrka vatnsbletti af yfirborðinu.

Tekkviður

Tekk er viðartegund sem notuð er í húsgögn bæði innan- og utandyra. Tekkviður er frábær efniviður fyrir aukahluti á baðherbergið þar sem hann þolir myglu og bakteríur. Hátt olíuinnihald viðarins gerir hann ónæman gegn vatni og myglu. Þó er mikilvægt að viðhalda viðnum á réttan hátt svo að hann haldist í toppstandi í áraraðir.

Stílráð fyrir baðherbergishluti

Oft fer fyrir bí að hugsa um stíl þegar baðherbergið er hannað og við gleymum því oft að baðherbergið er fyrsta og síðasta rýmið sem við sjáum þegar við förum á fætur eða í bólið. Hér eru nokkur ráð til að gera baðherbergið fallegt.

• Ekki bæta við hlutum í öðrum litum en hvítum og dröppuðum ef baðherbergið er hvít- eða drappmálað. Drappað tannburstaglas eða sápudiskur úr postulíni virkar vel.

• Ef baðherbergið er hvítt þá geturðu þó gefið því dass af rauðum lit. Þú getur til dæmis valið rauða baðmottu, rautt tannburstaglas og rauðan klósettrúlluhaldara til að hafa allt í stíl.

• Túrkís og gull virkar vel saman. Baðherbergi með hlutum í þessum litum líta vel út með túrkíslituðum settum. Þú getur einnig bætt við gulllituðum handklæðakrókum.

• Gulllitaður málmur er einnig frábært val á drapplitað baðherbergi. Þú getur til dæmis valið spegil með gulllituðum ramma og bætt við tveimur gylltum veggljósum til hliðar.

• Ef baðherbergið er með bleiku ívafi þá er sniðugt að velja hvíta aukahluti. Þú getur einnig sameinað tvo bjarta liti eða tekið djarfar ákvarðanir með bleikum, hvítum og svörtum litum.

Hvernig þú viðheldur baðherbergishlutum

Til að þú getir haldið baðherbergishlutum í toppstandi þá er mikilvægt að þú vitir hvernig þú átt að hugsa um þá. Hægt er að nota allskyns baðherbergishreinsivörur til að halda hlutunum á baðherberginu gljáandi. Eftirfarandi eru nokkrar ábendingar um umhirðu á baðherbergishlutum.

• Tannburstaglas

Tannburstaglas gæti hugsanlega verið sá aukahlutur sem mikilvægast er að þrífa reglulega. Gerlar og bakteríur geta auðveldlega flutt sig frá glasinu yfir í tannburstann og á endanum ofan í þig. Auðvelt er að hreinsa haldara úr gleri, plasti eða málmi vikulega í uppþvottavél.

• Sápudiskur

Þú getur komið í veg fyrir uppsöfnun sápuskánar í sápudiski með því að velja gerð með rifum sem hleypir vatni úr disknum. Þetta kemur í veg fyrir að vatn safnist fyrir undir sápudisknum. Ef sápuskán safnast hins vegar upp í disknum þá skaltu leggja hann í bleyti með blöndu af matarsóda og eplaediki. Endurtaktu þetta einu sinni í viku.

• Klósettburstahaldari

Mikilvægt er að þrífa klósettburstahaldarann að minnsta kosti einu sinni í viku. Leggðu burstahaldarann í bleyti í sjóðandi vatn með ediki eða bleikiefni í að minnsta kosti klukkustund. Notaðu síðan svamp vættan með uppþvottalegi til að skrúbba haldarann. Settu haldarann á gamalt handklæði og láttu hann þorna útivið.

• Sturtuhengi

Þú getur hreinsað sturtuhengið með öðrum heimilishlutum. Ef hægt er að þvo sturtuhengið í þvottavél þá geturðu þvegið það með handklæðum og öðrum hlutum á léttu prógrammi. Ef þú hefur möguleika á því þá er best að þurrka sturtuhengið útivið. Hreinsaðu það reglulega til að halda því myglulausu.

Skoðaðu úrvalið okkar til að finna réttu aukahlutina fyrir baðherbergið.